Hlýddu á nýja lagið með Kanye West og Kendrick Lamar

Rapparinn Kanye West sendi í kvöld frá sér nýtt lag en hann hefur heitið því að senda frá sér nýja tónlist á hverjum föstudegi í náinni framtíð.

Nýja lagið ber heitið Real Friends og má hlýða á það á tónlistarveitunni Soundcloud eða á heimasíðu West. Brot úr lagi sem kallast No More Parties in LA fylgir einnig með en þar nýtur West liðsinnis rapparans Kendrick Lamar.

Ef marka má viðbrögð í athugasemdum á vefsíðu Soundcloud eru aðdáendur West almennt nokkuð ánægðir með nýjasta framlag kappans, sem sendi síðast frá sér plötuna Yeezus árið 2013. Platan SWISH er væntanleg á árinu en ekki liggur fyrir hvort þessi nýju lög verði þar að finna.