Danski svindlarinn gerði bróður sinn og tvo samstarfmenn gjaldþrota og skuldar Eimskip

Í gærkvöldi var sýndur þáttur á dönsku ríkissjónvarpsstöðinni DR1 af danska hrappnum sem selt hefur mörgum Íslendingum stolna bíla og greint var hér frá í fyrradag. Þátturinn heitir Kontant og er neytendaþáttur.

Í honum kom fram að Karsten hefur svikið og prettað marga samlanda sína í bílaviðskiptum, meðal annars selt fólki bíla fyrir margar milljónir króna og afhent þá aldrei. Þar kom einnig fram að nokkrir af bílunum sem komnir eru hingað til lands eru frá lítilli bílaleigu sem danski hrappurinn, Karsten Meyerdahl, sagðist ætla að hjálpa að finna viðskiptavini fyrir, en stal bílunum þess í stað og sendi til Íslands. Hann fékk flutning á bílunum hjá Eimskip og skuldar enn fyrir þann flutning.

Einnig er rætt við konu sem leigði Karsten íbúð, en Karsten stakk af frá fjögurra mánuða greiðslu leigunnar og sat leigjandinn uppi með skaðann. Þá kemur fram að hann hefur gert tvo fyrrum samstarfsmenn sína gjaldþrota með svikum og eldri bróður sinn einnig. Hann virðist heldur aldrei greiða neina reikninga heldur leggur eignir fram sem tryggingu, en þeim hefur hann iðulega stolið.

Fjallað er um enn fleiri pretti hans í þættinum og rætt við einn íslensku eiganda bílanna sem hann seldi hingað til lands, sem og eiganda einnar bílasölu sem falið var að selja þann bíl. Karsten hefur nú flúið frá öllu saman til Hvíta Rússlands eftir að danska sjónvarpið hóf að rekja slóð hans. Þessi þáttur í gær var fyrri þátturinn af tveimur og verður sá seinni í næstu viku.