Hlustaðu á nýtt lag með Kanye West

Rapparinn Kanye West sendi í morgun frá sér nýtt lag en hann hafði heitið því að senda frá sér nýja tónlist á hverjum föstudegi í náinni framtíð. Það mistókst greinilega eitthvað síðasta föstudag og kom lagið út í dag.

Nýja lagið ber heitið No more Paries in L.A. og má hlýða á það á tónlistarveitunni Soundcloud eða á heimasíðu West. Lagið vinnur hann með Kendrick Lamar og á dögunum kom út lagið Real Friends og var þar Lamar einnig mættur.

Ef marka má viðbrögð í athugasemdum á vefsíðu Soundcloud eru aðdáendur West almennt nokkuð ánægðir með nýjasta framlag kappans, sem sendi síðast frá sér plötuna Yeezus árið 2013. Platan SWISH er væntanleg á árinu en ekki liggur fyrir hvort þessi nýju lög verði þar að finna.