Fyrsti jepplingur Seat

Næsta miðvikudag mun Seat kynna sinn fyrsta jeppling, en hann verður einnig sýndur á bílasýningunni í Genf sem hefst í næsta mánuði. Heyrst hefur að þessi bíll muni fá nafnið Ateca og með því heldur Seat áfram að nefna bíla sín eftir stöðum í heimalandinu, Spáni.

Þessi bíll á að keppa við Nissan Qashqai og Mazda CX-5 og er ámóta að stærð. Seat hefur ekki mikið látið uppi um bílinn en hann er smíðaður uppúr hugmyndabílnum 20V20 sem sýndur var í Genf á síðasta ári.

Ateca er eins og margur annar bíllinn í stóru bílafjölskyldu Volkswagen byggður á MQB undirvagninum og er þetta sami undirvagn og er í Volkswagen Tiguan jepplingnum. Það kemur vart á óvart að Seat sé að framleiða jeppling, en enginn flokkur bíla vex hraðar í sölu en jepplingar og Seat ætlar ekki að missa af þeim tækifærum í sölu bíla.

Sala bílsins hefst á miðju þessu ári og mun hann kosta um 20.000 evrur, eða undir 3 milljónum króna. Seat jók sölu bíla sinna á síðasta ári um 2,4% og seldi alls 400.037 bíla. Á síðust árum hefur ekki tekist að reka Seat fyrirtækið með hagnaði, en þó hafa sést veruleg batamerki á því að undanförnu og tilkoma þessa jepplings mun ef til vill snúa taprekstri uppí hagnað.

Þó svo að Ateca verði með Seat merkið á húddinu verður jepplingurinn smíðaður af Skoda í verksmiðju í Kvasiny í Tékklandi.