Emmsjé Gauti og Úlfur Úlfur helstu fyrirmyndirnar

Róbert Laxdal er sautján ára gamall rappari sem sendi í desember síðastliðnum frá sér sína fyrstu plötu og ber hún nafnið Púsluspil. Hann hefur alltaf haft mikinn áhuga á rappi en segir jafnframt að móðir sín, Ingibjörg Ferdinandsdóttir, eigi sinn þátt í að kveikja áhugann á rappi. „Já, ég hef alltaf haft mikinn áhuga á rappi. Mamma mín er líka oft að segja mér frá því, þegar ég var í maganum á henni, þá var hún mikið að hlusta á Snoop Dogg og Eminem og eitthvað svoleiðis, þannig að hún vill meina að hún hafi haft einhver áhrif á þetta,“ segir Róbert spurður út í rappáhugann. „Ég myndi líka segja að hún væri líklega helsti aðdáandi minn og sú sem sýnir þessu mestan áhuga,“ bætir Róbert við.

Semur textana sjálfur

Platan kom út á streymissíðunni SoundCloud, þar sem hægt er að hlusta á hana frítt. Hann semur alla textana á plötunni sjálfur en fékk þó smá aðstoð við gerð plötunnar, meðal annars frá félaga sínum, Arnóri Breka, en saman unnu þeir Rímnaflæði árið 2013. „Arnór á einhverja fjóra takta á plötunni og eitthvað í nokkrum textum. Svo er ég líka með aðra takta sem ég hef meðal annars keypt á netinu en þetta er náttúrulega bara frí plata þannig að ég er ekki að græða neitt á þessu. Ég gef Arnóri mikið kredit því hann mixaði líka plötuna,“ útskýrir Róbert.

Tónlistarmaðurinn Valgeir Skagfjörð masteraði plötuna en Valgeir er fyrrverandi píanókennari Róberts. „Við kynntumst þegar ég var að læra á píanó hjá honum. Svo missti ég áhugann á píanóinu en hélt alltaf sambandi við hann. Hann bauðst svo til að mastera stök lög fyrir mig og á endanum masteraði hann alla plötuna.“

Draumur að rappa með Emmsjé Gauta

Róbert á sér nokkra uppáhaldsrappara og segir að Kanye West og Pharrell séu hans helstu áhrifavaldar en á hann sér einhverja uppáhaldsrappara hér á landi? „Emmsjé Gauti og Úlfur Úlfur eru í uppáhaldi í rappinu en almennt, þá finnst mér Ásgeir Trausti vera rosalega góður, ég myndi segja að platan hans væri uppáhaldi hjá mér núna.“

„Já, það væri alveg geðveikt,“ segir Róbert léttur í lundu, spurður út í hvort hann dreymi um að rappa með sínum uppáhaldsröppurum, Emmsjé Gauta og Úlfi Úlfi.

Róbert er úr Mosfellsbænum, sem hefur jú alið af sér kanónur í íslensku rappsenunni eins og Dóra DNA og Steinda Jr, og stundar nám við Verzlunarskóla Íslands og er þar á öðru ári. Hann segist taka lítið eftir rappsenunni í Verzló en hefur áhuga á að vinna í tónlist með öðrum. „Ég tek lítið eftir því sem er að gerast í rappinu í Verzló en ég hef sjúklegan mikinn áhuga á að kynnast fólki sem er að gera tónlist og er á svipuðum aldri og ég,“ segir Róbert.

Kominn með efni í nýja plötu

Róbert leggur mikið í sköpun sína og vann til að mynda að sinni fyrstu plötu í næstum heilt ár. „Ég byrjaði að vinna í plötunni í janúar og hún kom út í desember, þannig að það fór alveg heilt ár í hana. Mér finnst að tónlistarmenn verði að hafa trú á sjálfum sér og því sem þeir eru að gera og alls ekki búa til einhverja ákveðna tegund af tónlist bara svo fólki líki við þá og hlusti á þá. Mér finnst að tónlistarmenn eigi að búa til tónlist sem þeim þykir vera best og helst leggja mikla vinnu í það sem þeir eru að gera,“ útskýrir Róbert.

Um þessar mundir er hann að vinna að tveimur plötum, önnur verður á íslensku og hin á ensku. „Ég er næstum því alveg tilbúinn með nýja plötu. Ég er meira að segja líka að vinna í annarri plötu með félaga mínum, Davíð Fannari, en hún verður á ensku.“

Hann segir þó að hann eigi auðveldara með að skrifa texta á íslensku heldur en ensku. „Ég get skrifað eitt lag á íslensku á mjög stuttum tíma en þegar ég skrifa á ensku þarf ég að leggja meiri vinnu og tíma í þetta.“

Róbert veit ekki alveg hvenær næsta plata kemur út en gerir ráð fyrir að það verði á árinu.