Bleikjan kemur vel undan vetri í Hraunsfirði

Hraunsfjörður er eitt þekktasta vígi sjóbleikjunnar á vesturlandi en þarna má oft ná í vænar bleikjur.

Bleikjan sem heldur til í vatninu allt árið virðist koma afskaplega vel undan vetri en þeir sem hafa kíkt í Hraunsfjörðin síðustu daga hafa kannski ekki veitt þær margar en þeir eru vel haldnar og vænar.  Algengt er að ná 2-3 punda bleikjum og nokkrar vænni en það hafa slitið sig lausar.  Þeir sem þekkja vatnið vel gera yfirleitt alltaf einhverja veiði en eins og veiðimenn þekkja er bleikjan ansi dyntótt og suma daga, þrátt fyrir að sjá vakir, er engin taka á flugur veiðimanna.  Síðan gerist eitthvað sem breytir aðstæðum aðeins og þá eru allir með á í einu.

Hraunsfjörður er annars um margt merkilegt vatn en í það gengur sjóbleikja, lax og stöku sjóbirtingur og í því er líka staðbundin bleikja og flundra en hún þykir frekar meinsemd í vatninu frekar en eitthvað annað því hún étur hrognin undan bleikjunni í hrygningu.  Hraunsfjörður er hluti af Veiðikortinu.