Veiðivötn mun betri en á sama tíma í fyrra

Veiðin fer ekki bara vel af stað í laxveiðinni það er líka mikill munur á hálendisveiðinni frá sumrinu í fyrra.

Eins og veiðimönnum er væntanlega ferskt í minni var ennþá ís á sumum vötnunum við Veiðivötn í fyrra þegar fyrstu veiðimenn mættu á staðinn en allar aðstæður voru öllu betri núna.  Það sást líka strax á fyrsta degi á veiðinni en það voru flestir í fiski og margir gerðu hreinlega frábæra daga.

Á þessum sex dögum sem eru frá opnun höfum við reglulega heyrt í mönnum sem eru að koma úr vötnunum og það bera allir veiði og tíðarfari góða söguna.  Holdafarið á fiskinum er mjög gott og greinilegt að hann hefur verið í nægu fæði í vetur.  Litli Sjór er sem fyrr vinsælasta vatnið en Hraunsvötn, Ónýtavatn, Skálavatn, Fossvötn og Snjóölduvatn eru mikið stunduð og það hafa komið mjög góð skot í þau öll.  Það komast færri að en vilja í Veiðivötn eins og venjulega en það gerist þó alltaf af og til að það losni stangir og fyrir þá sem vilja fylgjast með er rétt að benda á heimasíðu Veiðivatna en þar detta stundum inn lausar stangir.