Átjándi sigur Porsche í Le Mans

Le Mans kappaksturinn, sem er erfiðasta þolraun bílaiðnaðarins, var haldinn í Frakklandi í 84. sinn um síðustu helgi. Í ár kepptu sextíu bílar í Le Mans og voru þeir þandir til hins ýtrasta allan tímann. Eitthvað varð því undan að láta sem og varð raunin, því einungis 44 bílar skiluðu sér alla leið í mark. Sigurganga Porsche í þessari mögnuðu sólarhringskeppni, hófst 14. júní, 1970.

Núna um helgina, eftir eina jöfnustu keppni sem um getur í sögunni, landaði sigurlið Porsche sínum átjándi sigri. Svo hörð og dramatísk var keppnin lengst af, að þegar 18 stundir voru liðnar af 24, skildi innan við mínúta að fimm fremstu bílana; tvær Toyotur, Porsche sem vann að lokum og bíla frá Audi. Ökumenn sigurbílsins frá Porsche, sem fögnuðu sigri fyrir framan 260.000 áhorfendur, voru Neel Jani frá Sviss, hinn franski Roland Dumas og Þjóðverjinn Marc Lieb.

Að þessari keppni lokinni leiðir Porsche aðra bílaframleiðendur með 127 stigum, stendur 95 stigum framar en Audi og 78 stigum framar en Toyota. Ökumennirnir Dumas, Jani og Lieb hafa 94 stig og leiða aðra ökumenn með 39 stigum.