Síðasta V8 vél Audi?

Þar sem Audi leggur nú höfuðáherslu á smíði sparneytinna bíla og þá helst knúna rafmagni gætu V8 vélar Audi runnið sitt skeið bráðlega. Stefna Audi er að 25%-35% bíla þeirra árið 2025 verði knúnir rafmagni og öll áhersla í þróun nýrra bíla hjá fyrirtækinu er á slíka bíla.

Í því ljósi er harla ólíklegt að Audi muni eyða miklu púðri í að þróa nýjar V8 vélar sem er jú ávallt fremur eyðslufrekar vegna stærðar sinnar. Audi býður nú til dæmis V8 dísilvél í SQ7 jeppa sínum sem sturtar út 435 hestöflum til allra hjólanna og kemur honum í 100 km hraða á litlum 4,8 sekúndum. Þar vantar ekki aflið en til þess þarf að brenna dágóðum dropanum og það rýmar ekki beint við nýja stefnu Audi.

Þessi tiltekna vél verður einnig í boði í nýjum Porsche Panamera og þar verður hún líklega enn öflugri, enda Porsche bílar eru skörinni hærra í goggunarröð Volkswagen bílafjölskyldunnar. Ekki er ljóst hvenær Audi mun hætta að bjóða V8 vélar í bílum sínum og vonandi er það ekki alveg á næstunni.