Ytri Rangá komin yfir 3.000 laxa

Það er svakaleg veiði í Ytri Rangá þessa dagana og nokkuð ljóst að það þarf mikið til að skáka henni við í sumar.

Í gærmorgun fór áin yfir 3.000 laxa eins og við spáðum réttilega fyrir og líklega verður hún komin yfir 4.000 fljótlega eftir verslunarmannahelgi.  Það er bókstaflega lax í öllum hyljum og mikið að ganga eins og er.  Holl sem var til að mynda á neðsta svæðinu sem er kennt við Borg var með 53 laxa á tveimur dögum á fjórar stangir og sá hópur var nú nokkuð rólegur við veiðarnar en allt reyndir veiðimenn engu að síður.  Lausar stangir sem detta stundum inn á söluvefi eru rifnar út og það er kannski ekkert skrítið því þegar það er svona veisla við árbakka vilja allir taka þátt í því.  Það verður spennandi að fylgjast með framvindu næstu daga og sjá hvort það verði áframhald á góðum göngum og verði það málið heldur veislan bara áfram.