BL stefnir í 5.000 bíla

Alls voru 4.502 bílar af merkjum sem BL hefur umboð fyrir nýskráðir fyrstu níu mánuði ársins. Það er 60% aukning frá sama tímabili í fyrra þegar 2.806 bílar voru skráðir á tímabilinu. Hjá BL var 261 bíll nýskráður í september, þar af 244 til einstaklinga og fyrirtækja, og var markaðshlutdeild fyrirtækisins 22,9% í mánuðinum.

Í heild nemur hlutdeild BL 26,1% fyrstu níu mánuði ársins en 26,6% sé einungis litið til bílakaupa einstaklinga og fyrirtækja án bílaleiga. Ekkert annað bílaumboð hefur selt jafn marga bíla á árinu og BL og er nú fastlega gert ráð fyrir að rúmlega fimm þúsund bílar af merkjum BL verði nýskráðir á árinu. Þegar litið er til söluhæstu einstakra bíltegunda hjá BL í september voru 78 Nissan bílar nýskráðir, 61 frá Hyundai og sami fjöldi af gerðinni Renault. Sem fyrr er Hyundai söluhæsta einstaka bíltegund BL ehf. með alls 1.267 nýskráða á árinu.

Alls voru 79 bílaleigubílar skráðir í september, þar af 17 af gerðum sem BL hefur umboð fyrir og munaði mest um Renault þar sem þrettán bílar voru nýskráðir til bílaleiganna. Í heild voru 40% fleiri bílaleigubílar nýskráðir fyrstu níu mánuði ársins miðað við sama tímabil í fyrra, alls 8.218 í ár samanborið við 5.859 í fyrra. Munurinn er 2.359, en athyglisvert er að aðeins munar einum bíl á fjölda nýskráðra bílaleigubíla í nýliðnum september og sama mánuði 2015. Verulega hefur því hægst á nýskráningum bílaleigubíla.