Fyrsti þáttur The Grand Tour í dag

Þá er biðin loks á enda! Eftir 19 mánuði án þeirra Jeremy Clarkson, Richard Hammond og James May úr Top Gear þáttunum er komið að sýningu fyrsta þáttarans af nýrri The Grand Tour þáttaröð og verður þátturinn sýndur á Amazon Prime netsjónvarpinu í Bandaríkjunum í kvöld.

Mikil eftirvænting ríkir eftir sýningu þessa fyrsta þáttar og herma heimildir að þessir þættir séu af enn stærri skala en þættir Top Gear með þeim þremenningum. Ef marka má myndir sem birst hafa af einstaka atriðum úr þáttunum er ekkert til sparað við gerð þeirra. Til dæmis er upphafsatriði fyrsta þáttar í anda Mad Max: Fury Road þar sem ógn og býsn af ökutækjum ekur eftir ónefndri eyðimörk.

Til að byrja með er aðeins hægt að sjá þættina í Bandaríkjunum, Bretlandi, Japan og Þýskalandi, en frá og með desember verður hægt að sjá þættina í 200 löndum heimsins.