Töluvert af tófu á rjúpnaslóðum

Það þarf ekki að koma mikið á óvart að sjá tófur þegar gengið er til rjúpna enda er veiðimaðurinn sannarlega að keppa við refinn um bráðina.

Veiðimenn hafa haft orð á því að nokkuð sé af tófu á þeim svæðum þar sem mikið er gengið til rjúpna og á kraganum umhverfis höfuðborgarsvæðið hefur sést meira en menn muna eftir.  Sem dæmi má nefna að á laugardaginn voru skotnar fimm tófur á svæðinu upp af Þingvöllum og fleiri sáust en komu sér undan.  Þetta eru staðfest felld dýr þar sem skyttur hafa mynd og vitni til að staðfesta dýrið.  Tvær tófur voru skotnar við Uxahryggi, ein við Kvígindisfell, ein við Ok og sú fimmta neðst við Kaldadal.

Þessar sömu skyttur sáu að sama skapi afskaplega lítið ef rjúpu á þessum slóðum og það fréttist ekki af mörgum sem náðust á þessu svæði um helgina.  Veðrið var rjúpnaskyttum afskaplega óblítt um helgina og fuglinn sem fannst var að sama skapi afskaplega styggur.  Það er ekki auðvelt að koma með skýringu á því af hverju svona margar tófur sáust á svæðinu um helgina en ekki er vitað til þess að talning hafi farið fram á þessu svæði svo það er í raun ómögulegt að segja hvort þetta sé einskær tilviljun eða þá að tófunni sé að fjölga.