Volkswagen rafmagnsrúgbrauð 2019

Bílatímaritið Autocar greinir frá því að einn af þeim 5 rafmagnsbílum sem Volkswagen ætlar að kynna áður en árið 2020 er liðið sé þessi BUDD-e Microbus og að líklega verði hann kominn í fjöldaframleiðslu árið 2019. Þessi bíll svipar svo mikið til gamla rúgbrauðsins að hægt væri að kalla hann rafmagnsrúgbrauð.

Lengi hefur Volkswagen ýjað að arftaka rúgbrauðsins gamla og einn slíkur var kynntur sem tilraunabíll árið 2001, en hætt var við smíði hans árið 2005. Út frá honum kynnti Volkswagen Bulli tilraunabílinn, en ekki varð heldur af smíði hans.

Þessi BUDD-e er 7 sæta bíll sem byggður er á sama undirvagni og tilraunabíllinn iD sem Volkswagen kynnti á bílasýningunni í París í september nýliðnum, en þó er lengra á milli öxla í þessum bíl. Rafhlöðurnar verða í gólfinu og þyngdarpunkturinn því lágur og innanrýmið flatt og mikið. Bíllinn verður afturhjóladrifinn, ef hann verður framleiddur og Autocar hefur rétt fyrir sér.

Svo oft hefur Volkswagen reyndar hætt við smíði arftaka rúgbrauðsins að rétt er að sá örlitlum efasemdum um smíðina, en vonandi hefur tímaritið rétt fyrir sér.