Verður Yaris að spyrnukerru?

Þegar hugsað er um litlar spyrnukerrur í formi hlaðbaka leitar hugurinn ekki fyrst að Toyota Yaris, enda hefur hann aðeins fengist í fremur afllitlum útgáfum, en það gæti brátt breyst. Toyota hefur látið frá sér teikningar á ýmsum evrópskum samfélagsmiðlum undanfarið og þar sést að Toyota er alvara með að búa til kraftmikla og afar sportlega útgáfu af Yaris.

Yaris má fá í dag með 1,5 lítra og 105 hestafla vél en engir nema Toyota menn hafa hugmynd um hve öflug sportlega útgáfan á að vera. Líklega verður hún þó ekki eins öflug og í Yaris WRC bílnum sem keppa mun í heimsmeistararöðinni í rallakstri á næsta keppnistímabili, en sá bíll er hvorki meira né minna en 375 hestöfl sem aðeins kemur þó frá 1,6 lítra vél.

Toyota ætlar þó að þróa bílinn útfrá reynslu sinni af þessum rallbíl sínum og vonandi stenst hann snúninginn við bíla eins og Ford Focus RS og Subaru WRX STI. Það eru greinilega komnir skemmtilegir tímar hjá Toyota og áhugi núverandi forstjóra fyrirtæksins á aflmiklum bílum og keppnissporti er greinilega farinn af hafa jákvæð áhrif á fjöldaframleidda bíla þess líka. Eru það frábærar fréttir.