Faraday Future FF 91 er með meira afl og drægi en Tesla

Rafmagnsbílaframleiðandinn Faraday Future mun kynna FF 91 bíl sinn á Consumer Electronics Show í dag í Las Vegas í Bandaríkjunum. Sá bíll er með meira afl og drægi en langdrægustu Tesla bílar, eða 1.050 hestöfl, 1.800 Nm tog og 610 km drægi.

Rafhlöður bílsins eru heldur ekki af minni gerðinni, heldur 130 kW og frá LG Chem. Allt þetta afl dugar bílnum til að ná 100 km hraða á litlum 2,39 sekúndum og með því er hann sneggri en Ferrari 488 GTB, sem þykir þó enginn letingi.

FF 91 er engin smásmíði en bíllinn er 5,25 metra langur og því um 30 cm lengri en Tesla Model X. Hann er samt með afar lága loftmótsstöðu, eða 0,25 cd, en Nýji Toyota Prius er með 0,24 cd. Bíllinn er á 22 tommu felgum sem breyta um lag á ferð til að minnka loftmótsstöðu bílsins.

Hjá Faraday Future vinna nú 1.400 manns en fyrirtækið er stutt af kínverska fjármálaveldinu LeEco sem ljáð hefur fyrirtækinu mikla fjármuni til þróunar rafmagnsbíla. Fyrstu bílar Faraday Future bjóðast almenningi frá árinu 2018. Verksmiðja Faraday Future eru í Nevada og er stærð hennar nærri 300.000 fermetrar.

Fyrstu bílar Faraday Future bjóðast almenningi frá árinu 2018. Búist er við því að verð FF 91 bílsins verði á bilinu 150.000 – 200.000 dollarar, eða 17 – 22,6 milljónir króna. Tilvonandi kaupendum býðst að borga 5.000 dollara inná bíla sína og með því tryggja sér eitt af fyrstu eintökum bílsins.