Samdráttur í sölu bíla í desember nam 16,2%

Sala á nýjum bílum frá 1. til 31. desember sl. dróst saman um 16,2% en nýskráðir fólksbílar á þessu tímabili voru 706 stk. á móti 842 stk. í sama mánuði árið 2015, eða samdráttur um 136 bíla. Helsta skýring á samdrætti í nýskráningum fólksbíla í desember síðastliðnum frá árinu 2015 er að færri bílaleigubílar voru nýskráðir í desember miðað við sama mánuð árið 2015.

Hins vegar ef allt árið 2016 er skoðað var aukning um 31,4% í nýskráningum fólksbíla miðað við árið 2015 en samtals voru skráðir 18.442 fólksbílar á síðasta ári. Stór hluti af heildanýskráningum fólksbíla á síðasta ári eru bíleigubílar eða 8.846 stk. sem gera um 48% af heildinni á árinu 2016. 

Þrátt fyrir aukning hafi verið í sölu nýrra bíla til einstaklinga og fyrirtækja á síðasta ári á sá markaður nokkuð í land með að ná eðlilegu jafnvægi en meðalaldur bíla er enn alltof hár miðað við þau lönd sem við berum okkur gjarnan saman við.

Meðalaldur fólksbíla hér á landi er liðlega 12 ár en gamall bílafloti er bæði óöruggari og mengar meira en þörf væri á. Það er því mikið hagsmunamál þjóðfélagsins alls að yngja bílaflotann upp með öruggari og hagkvæmari bílum segir í frétt frá Bílgreinasambandinu.