Leita manns sem grunaður er um líkamsárás í Sambíóum

Búið er að kæra líkamsárás sem átti sér stað í Sambíóunum í Egilshöll í síðustu viku. Sá sem kærði er piltur um tvítugt en lögreglan hefur ekki haft upp á þeim sem er talinn vera gerandinn.

„Það á eftir að hafa upp á honum en við erum með vissar grunsemdir um það hver hann er,“ segir Ásgeir Pétur Guðmundsson, lögreglufulltrúi á höfuðborgarsvæðinu, sem fer með rannsókn málsins.

Árásin átti að hafa átt sér stað fyrir utan kvikmyndasal í Sambíóunum í Egilshöll og er talað um að undir lok árásarinnar hafi gerandinn rifið upp áhald sem líktist hnúajárni en Ásgeir Pétur segir enga staðfestingu hafa fengist á því. Hann segir þann sem varð fyrir árásinni hafa hlotið einhverja áverka.

Ásgeir segir ekki komið að þeim tímapunkti í rannsókninni að lýsa eftir þeim sem er talinn hafa verið gerandi í málinu. „Við eigum að geta fundið út úr því. Það eru það góðar vísbendingar.“