Bílabúð Benna lækkar verð

Bílabúð Benna hefur ákveðið að lækka verð á öllum nýjum bílum, dekkjum og varahlutum, vegna styrkingar krónunnar. Verðlækkunin er mismunandi eftir tegundum og vöruflokkum, en getur numið umtalsverðum upphæðum.

Í tilkynningu kemur fram að það sé kappsmál hjá Bílabúð Benna að koma hagstæðri gengisþróun, til viðskiptavina sinna. Fyrirtækið hafi gripið tækifærið fyrir nokkrum mánuðum og lækkað verð umtalsvert og nú hafi myndast svigrúm til að lækka það enn og aftur.

Verðbreytingarnar eiga m.a. við um dekk sem lækka verulega í verði, óháð því hvort um vetrardekk, sumardekk eða heilsársdekk er að ræða. Þær bílgerðir sem lækka í verði eru Opel, SsangYong og Porsche. Þar er tekið dæmi verðið á Opel Corsa Essentia sem lækkað hefur um 10% og kostar nú aðeins 1.990 þús. kr.

Þá er tilgreindur Rexton, fullvaxinn jeppi frá SsangYong, sem lækkar í 4.790 þús. kr.  Áhugafólk um Porsche fær líka góðar fréttir, því nú er hægt að fá sportjeppann margverðlaunaða, Porsche Macan, á 8.950 þús. kr. Verðlækkunin gildir frá og með laugardeginum 4. mars.

Bílabúð Benna slær upp stórsýningu í Tangarhöfðanum og frumsýnir þar lækkuð verð á Opel og SsangYong, laugardaginn 4. mars. Allir eru velkomnir milli kl. 12:00 og 16:00