Hyundai i30 hlaut hönnunarverðlaun iF

Hyundai hlaut á dögunum hin alþjóðlegu hönnunarverðlaun International Design Formum Design (iF) fyrir hönnun nýrrar kynslóðar fólksbílsins i30 sem er að koma á markað í Evrópu um þessar mundir. Bíllinn verður frumsýndur hér á landi næsta laugardag, 1. apríl, hjá Hyundai í Garðabæ.

Þetta er fjórða árið í röð sem Hyundai hlýtur verðlaun fyrir hönnun nýju Evrópulínunnar. Verðlaunin, sem afhent voru í mars, voru veitt fyrir sannfærandi og sígilda hönnun i30 sem er að mati dómnefndar er bæði tímalaus og einkennandi fyrir nýja og stefnumarkandi línu Hyundai á Evrópumarkaði. 

Peter Schreyer, framkvæmdastjóri og yfirhönnuður hjá Hyundai Motor Group, segir að ný kynslóð i30 hafi á sér sportlega ásýnd sem kalli fram traustvekjandi nærveru, hvort sem litið sé til mjúkra lína í ytra útlit eða vandaðs frágangs í farþegarýminu.

Eins og aðrir fólksbílar Hyundai á Evrópumarkaði var i30 þróaður og hannaður í hönnunarsetri fyrirtækisins í Þýskalandi og er bíllinn framleiddur í bílaverksmiðju fyrirtækisins í Tékklandi. Í meira en 60 ár hafa hönnunarverðlaun iF International Forum Design verið veitt fyrir framúrskarandi hönnun í fjölmörgum greinum og flokkum í 59 löndum og eru farartæki (bílar og hjól) aðeins einn þessara flokka.