ÍRiiS frumsýnir nýtt tónlistarmyndband: „Nornin hvíslar eyru í og leggur fram sinn mátt“

Vísir frumsýnir í dag nýtt tónlistarmyndband við lagið Nornin eftir ÍRiiS, sem er listamannsnafn tónlistarkonunnar Írisar Hrundar Þórarinsdóttur.

Myndbandið er unnið af þeim Írisi Hrund og ljósmyndaranum Kristina Petrosiute en tökur hófust fyrir ári síðan.

„Verkið hefur verið í vinnslu í þó nokkurn tíma, enda margir tökustaðir og ólíkir þátttakendur. Hvert einasta skot varð að vera rétt,” segir Íris.

Myndbandið felur í sér skírskotun til íslenskrar sagnahefðar og þess umhverfis sem hana hefur mótað. Lagið lýsir því að fyllast lotningu yfir því sem fyrir augu ber og falla þar með undankomulaus undir álögin sem slík upplifun hefur í för með sér.

„Nornin hvíslar eyru í og leggur fram sinn mátt. Með galdrastaf og kukl í kló, hún breytir mér.” segir Íris og vitnar í texta lagsins.

Blaðamaður spyr út í leikaraval og hver hugsunin sé á bak við samspil líkama og náttúru og segir Íris þar liggja samruna tveggja póla. Skilin milli hins mannlega og hins ómennska verða óljós og veröldin rennur saman í eitt.

En hvernig gekk að finna þátttakendur miðað við þessar kröfur?  

„Veistu, það var furðu auðvelt. Ég held ég hafi ekki fengið eina einustu neitun og það virtust allir tilbúnir til að stökkva úr fötunum og beint út í rokið. Það má kannski segja að þessu fylgi ákveðin frelsunartilfinning. Klárlega eitthvað sem allir ættu að prófa allavega einu sinni á ævinni,” segir Íris að lokum.   

Íris á að baki hljómplötuna Penumbra sem kom út árið 2013 en Nornin markar upphaf að væntanlegri EP plötu.

Tenglar

Instagram https://www.instagram.com/iriismusic/

Soundcloud https://soundcloud.com/iriismusic

Youtube https://goo.gl/adXXkO

Twitter https://twitter.com/IRiiSmusicIS

Facebook https://www.facebook.com/irismusiciris/

https://www.kristinapetrosiute.com/