Þarmaflóran var að fara með Jón Viðar

Mikil vakning er nú á Íslandi sem snýr að upplýsingu um mikilvægi þarmaflórunnar, að hún sé í jafnvægi. Vísir og Bylgjan fjölluðu ítarlega um málið í gær en Sigurjón Vilbergsson meltingarfræðingur hefur meðal annars bent á að þarmaflóran stjórni líklega miklu meiru en við gerum okkur grein fyrir. Og hafi mikil áhrif, meðal annars á andlega líðan. „Menn hafa verið að skoða þarmaflóru með tilliti til kvíða og þunglyndis og einhverfu, athyglisbrests og núna síþreytu. Menn sjá að þarmaflóra þessa hópa og síþreytuhópsins hún er ekki eins og hjá þeim sem eru hraustir,“ segir Sigurjón.

Jón Viðar illa þjakaður af síþreytu

Einn þeirra sem stigið hefur fram á opinberum vettvangi og lýst einmitt þessari reynslu er hinn kunni leiklistarfræðingur og gagnrýnandi, Jón Viðar Jónsson. Hann segir þetta ríma við sína reynslu.

„Það er ekki nokkur minnsti vafi á því að þetta er rétt,“ segir Jón Viðar á Facebooksíðu sinni.

„Fyrir tíu árum var ég orðinn mjög illa haldinn af síþreytu. Eftir að hafa talað við marga lækna og farið í bæði hjarta- og magarannsóknir, sem ekkert sýndu annað en ég væri alheilbrigður, var mér bent á að tala við Hallgrím heitinn Magnússon lækni. Hallgrímur, sem var ekki haldinn neinni ofurtrú á vestræn læknavísindi þó hann væri sjálfur vel menntaður læknir, ráðlagði mér að fara á hreinsandi kúra sem ég gerði síðan af og til næstu ár. Ég tel að þetta hafi bjargað heilsu minni og lífi,“ skrifar Jón Viðar.

Ekki er úr vegi að ætla að margur leikhúsmaðurinn, sem telur sig grátt leikinn í óvægnum leikdómum Jóns Viðars muni skrifa skammirnar á báborið ástand þarmaflóru gagnrýnandans fremur en að hann hafi átt hirtingu skilið. En, það er önnur saga.

Sítrónan allra meina bót

Hallgrímur læknir féll frá eftir alvarlegt umferðarslys en hann fór ekki troðnar slóðir í störfum sínum, hann var umdeildur maður og fór það fyrir brjóst margra þegar hann meðal annars varðaði við mjólkurneyslu – hann sagði mannskepnuna ekki gerða fyrir mjólkurþamb.

Hins vegar taldi Hallgrímur sítrónuvatn allra meina bót. Sem hreinsaði eiturefni úr líkamanum. Best er að kreista um hálfa sítrónu í volgt vatn og drekka á tóman maga strax í morgunsárið, sagði Hallgrímur meðal annars, en hann var í hávegum hafður meðal margra sem þakka honum bætta heilsu sína.