Þórunn Antonía: Hugsum í lausnum ekki nöldri

„Ég var búin að brynja mig fyrir þessu,“ segir Þórunn Antonía Magnúsdóttir.

Eins og Vísir hefur greint frá hefur verið sett fram fremur harkaleg gagnrýni á herferð hennar, hvar sjálfur forseti Íslands er verndari, gegn nauðgurum. Herferðin gengur út á að vekja athygli á þeirri aðferð nauðgara sem fara um og byrla ólyfjan í glös þeirra sem eru úti á lífinu. Meðal þeirra sem láta herferðina fara í taugarnar á sér eru ýmsir þekktir femínistar. Gagnrýnin gengur einkum út á það að verið sé að koma ábyrgð yfir á fórnarlambið. Því hafnar Þórunn Antonía.

„Ég get ekki galdrað burt allar illar kenndir sem fólk hefur. Þarna er ég að reyna að vekja máls á vanda sem er til og reyna að finna einhverja lausn á því. Ef ég get bjargað einni manneskju með þessu þá er þetta strax orðið þess virði,“ segir Þórunn Antonía í samtali við Vísi.

Enginn að varpa ábyrgð yfir á fórnarlambið

Hún bendir á, sem henni sýnist vera mikill misskilningur, að herferðin sé ekki bara hugsuð með konur í hlutverki fórnarlambs. „Þetta er hugsað til að auka öryggiskennd bæði karla og kvenna. Það eru ekki bara stelpur sem verða fyrir kynferðisofbeldi. Það er rangt. Með þessu erum við að dreifa athyglinni, vekja leigubílsstjóra, dyraverði, barþjóna til vitundar um þetta mein; fá flotta einstaklinga sem segja það sé bannað að nauðga. Rangt að beina þessu yfir á að það séu bara konur sem eru fórnarlömbin.“

Herferðin gengur út á að fólk fær miða sem það getur sett yfir glas sitt. „Maður notar hjálma, bílbelti, smokka ... af hverju er það svo slæm hugmynd að geta lokað glasi sínu þegar til er fólk sem byrlar? Þetta er bara jákvætt og gott hugsað til að fólk geti skemmt sér betur og fundist það vera öruggara. Ef fólk er með betri hugmynd skal ég glöð fá forsetann og fleira fólk með okkur í það. Þetta er ekki lausn á vandanum, ég veit það en þetta er örugglega eitthvað sem vekur fólk til umhugsunar. Það er enginn að varpa ábyrgð á fórnarlambið heldur gefa fólki kost á að verja sig.“

Sameinumst gegn þessu meini

Þórunn Antonía segist ekki hafa svör við því hvaða kenndir það eru sem fá fólk til að vilja nauðga. En, ef fólki líður betur með að geta lokað glasi sínu þegar vitað er að á sveimi eru slíkir einstaklingar, þá hljóti það að teljast jákvætt í sjálfu sér. Hún er ekki tilbúin til að fullyrða að sá hópur sem rís upp öndverður gegn framtakinu telji sig hafa einkarétt á málaflokknum. Og hún segist vilja vera opin fyrir gagnrýni.

„En, ég vil þá sjá betri hugmyndir frá þeim. Og endilega hendum því í gang. Ég vil að það sé rætt um þessi mál og ef umræðurnar verða til þess að fram komi betri hugmyndir þá er það gott. Ég er að reyna að nýta hugmyndir mínar til góðs, varpa ljósi á skuggahliðar mannlífsins. Kæru þið sem eruð á móti þessari herferð; sameinumst gegn þessu meini. Hafa fókusinn á... gagnrýnisraddir, þetta er ekki bara fyrir konur. Það er ekki þannig. Við erum að reyna að passa uppá alla og hvað er svona slæmt við að vekja athygli á þessu?“