Hafa stöðvað 60 sendingar af Melatónín það sem af er ári

Það sem af er ári hefur tollurinn stöðvað rúmlega sextíu sendingar af svefnlyfinu Melatónín til landsins og hefur innflutningur á lyfinu aukist að undanförnu. Fagsviðsstjóri hjá Matvælastofnun segir aukið aðgengi lyfsins á netinu og vanþekkingu neytenda vera meðal áhrifaþátta.

Melatónín er lyfseðilsskylt á Íslandi og er flokkað sem svefnlyf. Melatonín er náttúrulegt hormón sem hefur svæfandi áhrif og eykur svefnhneigð.

Lyfið er ætlað til skamms tíma við svefnvanda hjá sjúklingum á aldrinum 55 ára eða eldri. Samkvæmt upplýsingum í sérlyfjaskrá eru áhrif langtímanotkunar á einstaklinga yngri en 55 ára ekki þekkt og því má segja að óvissa ríki um öryggi lyfsins fyrir þá sem yngri eru. Embætti landlæknis benti nýlega á að lyfið hafi áhrif á ýmis kerfi í líkama fólks og eru sérstakar áhyggjur af lyfjagjöf til barna og yngra fólks þegar langtímaáhrif eru ekki kunn.

Talsverðar umræður hafa verið í fjölmiðlum á Norðurlöndunum um öryggi Melatóníns og þá sérstaklega hvort þau geti haft áhrif á kynþroska barna.

Tollstjóri hefur stöðvað  rúmlega 60 sendingar á árinu og koma þær aðallega frá Bandaríkjunum í gegn um netverslanir en þar er lyfið markaðssett sem fæðubótarefni og er ekki lyfseðilsskylt.

Samkvæmt upplýsingum frá tollstjóra voru sendingarnar töluvert færri á árum áður en það var ekki fyrr en síðustu áramót sem byrjað var að skrá umræddar sendingar.

Melatónínið sem kemur ólöglega til landsins er oftast merkt sem fæðubótarefni hefur Matvælastofnun eftirlit með því.