María Lilja og Ingó Veðurguð komin í hár saman

Ingólfur Þórarinsson tónlistarmaður, sem betur er þekktur sem Ingó Veðurguð, segir rangt sem haldið er fram að hann hafi þegið lungann af fé sem ætlað var til lestrarátaks.

Í frétt Fréttablaðsins af fjármögnun lestrarátaks Illuga Gunnarssonar fyrrverandi menntamálaráðherra frá í morgun segir:

„Frá 1. janúar 2014 til loka árs 2015 hafði ráðuneyti menntamála samtals greitt um 25 milljónir króna vegna verkefnis um læsi. Meirihluti þess fjár fór til ráðgjafarfyrirtækja og umboðsskrifstofunnar Prime vegna lags sem Ingólfur Þórarinsson söng á hringferð um landið.“

Þetta hefur vakið nokkra athygli, meðal annars er vitnað í þetta í Facebookhópi sem heitir Druslubækur og doðrantar, þar sem því er velt upp hvort um sé að ræða dýrasta lag Íslandssögunnar. Og svo því hvort Ingó og Guðfinna Bjarnadóttir hafi skipt með sér þessum 25 milljónum, og vísað í eftirfarandi frétt.

Auk þessa hæðist María Lilja Þrastardóttir aktívisti að þessu og Ingó: „Sjálfbæri tónlistarmaðurinn sem er á móti ríkisstyrkjum til listafólks,“ skrifar María Lilja og lætur broskalla fylgja. Hún vísar til þess að Ingó hefur gagnrýnt listamannalaunin, sem olli verulegri ólgu á sínum tíma.

Lagið hans Ingó má heyra hér að neðan.

Sett fram með villandi hætti í pólitískum tilgangi

Ingó skrifar athugasemd á síðu Maríu Lilju, og segist eiginlega verða að bera hönd yfir höfuð sér.

„Þið leyfið ykkur að túlka þetta eins og ég hafi verið að fá þennan pening sem er fjarri lagi. Hef i raun ekki hugmynd i hvað þetta fór. Í fyrsta lagi fékk ég lága upphæð fyrir hvert „gigg“. Í öðru lagi væri ágætt ef þið mynduð gera greinarmun á þvi þegar músíkant spilar gigg gegn greiðslu og þegar hann má skapa að vild í boði ríkisins.“

Hann segir að í öllu falli sé þetta sett fram með röngum og villandi hætti hjá Maríu Lilju, og þá líkast til í pólitískum tilgangi. „Kórinn sem ver óréttlátt kerfi listamanna verður örugglega ánægður með þig.“

Ættir að lækka æsinginn út af næstu úthlutun úr listamannalaunasjóði

María Lilja hefur hins vegar ekki í hyggju að láta tónlistarmanninn eiga neitt inni hjá sér og svarar fullum hálsi:

„Ég held að þú ættir í besta falli að finna þér nýtt management kompaní ef þú veist ekki hvert þessi peningur fór.  Skv gögnum hins opinbera fékk Prime 5 milljónir og 30 þúsund fyrir lagið. Það er rosa stór hluti af þeim 25 milljónum sem varið var til barna og lestrar. Sitthvor vasinn, sömu buxurnar. Þú ættir kannski að lækka aðeins æsinginn við næstu úthlutun úr listamannasjóði,“ segir María Lilja og gefur til kynna með broskalli að henni sé skemmt.

Athugasemd:

Vísi hefur borist athugsemd sem er á þá leið að ekki er um umboðsskrifstofuna Promo að ræða, eins og segir í tilvitnun í Fréttablaðið, heldur umboðsskrifstofuna Prime. Lesendur eru beðnir velvirðingar á þessu.