Skömmin er okkar

Það er svo gaman að fara á völlinn í Færeyjum. Þar er boðið upp á færeyskan bjór og þar er boðið upp á stemningu. Leikur Færeyja og Sviss á laugardag var svo mikil uppgötvun fyrir okkur félagana að við gátum ekki annað en skammast okkar fyrir hvernig KSÍ og fótboltasamfélagið er að gera hlutina hér á landi.

Í Færeyjum er Torsvöllur með þrjár stúkur upp við völlinn. Fyrir aftan annað markið var VIP-svæðið og þar fyrir neðan hvatti 12-an þeirra Færeyinga liðið áfram. Á Laugardalsvelli er 12-unni haldið frá hefðarfólki.

Hægt var að kaupa sex bjóra í einu á Torsvelli og fékk maður þá svona pappadót með til að bera allan varninginn aftur í sætið sitt. Það mátti ekki sullast.

Í hálfleik var hægt að skjótast á veitingastaðinn 12.fo eða næla sér í súpu. Fá sér svo meiri færeyskan bjór, sem er frábær. Öll afgreiðsla gekk nokkuð snurðulaust fyrir sig og enginn var áberandi ölvaður. Færeyingar byrjuðu líka að fá sér bjór aðeins fyrr en við. Bjórdrykkja er jú ekki orðin þrítug á Íslandinu góða. Þeir sem vildu ekki bjór löbbuðu bara fram hjá. Sögðu bara nei, takk.

Fyrir leik var hægt að kíkja í minjagripabúðina til að kaupa trefla, búninga, húfur og fyndna bjórvettlinga í færeysku litunum.

Þó ég sé fegin að fanzone-menningin sé loks komin hingað á Íslandið góða þá verðum við að stíga út úr moldarkofanum. Við sýndum og sönnuðum á EM að við erum einir bestu og skemmtilegustu aðdáendur heims. Það er ekki einu sinni bara mitt mat heldur alþjóðasamfélagsins.

Bjóðum upp á innlendan bjór í fanzone. Hættum að vera sveitamenn með rollur. Það er allt í lagi. Það gerist ekki neitt, nema kannski einhver örlítill hávaði á vellinum.