Fín fyrsta vakt í Víðidalsá

Nú opnar hver laxveiðiáin á fætur annari og það styttist í að laxveiðin verði komin í fullan gír fljótlega eftir mánaðarmótin.

Víðidalsá opnaði í gær og við höfum fengið góðar fréttir af þeirri opnun en fyrsta vakt gaf fimmtán laxa og þann stærsta 94 sm.  Fyrsti laxinn kom upp úr einum besta staðnum í ánni, Harðeyrarstreng, og þar sáust fleiri laxar.  Það er lax á öllum svæðum og eins og von var á í Víðidalnum er stærsti hluti aflans vænn tveggja ára lax en þó hefur orðið vart við smálaxa víða í ánni.

Árnar á norðurlandi virðast flest allar fara mjög vel af stað og gefur þetta góða von um framhaldið en það kemur ekki í ljós fyrr en fyrstu smálaxagöngurnar mæta.  Einhverjir hafa þó haft á orði að þetta sé svolítið líkt sumrinu í fyrra sem fór af stað með hvelli en svo datt botninn hratt úr göngunum og lítið af fiski gekk í árnar eftir miðjan part sumars.  Þetta skýrist á næstu vikum þegar stóru flóðin hafa skilað sínu.