Ánægður með gang mála í Grímsá og Kjós

Sumarið 2016 var afar erfitt í mörgum ánum sökum vatnsleysis og mun minna af eins árs laxi en í venjulegu ári en það virðist stefna í betra sumar núna.

Laxá í Kjós og Grímsá eru undir vængjum Hreggnasa og hafa árnar verið afar vel bókaðar síðustu sumur enda mikið af föstum kúnnum sem sækja í þær á hverju ári.  Veiðin í fyrra var heldur döpur enda hrjáði vatnsleysi þær báðar en sérstaklega Laxá í Kjós sem hefur líklega sjaldan verið jafn vatnslítil og í fyrra.  Það var þó meira af laxi í henni en veiðitölur gefa til kynna en takan var bara afleit enda ekkert skrítið þegar hún rann varla á milli hylja og endalausir sólardagar hituðu ánna upp og gerði veiðimönnum erfitt fyrir.

"Laxá í Kjós fer ágætlega af stað þó það hafi aðeins hægt á veiðinni en þetta eru ekkert óeðlilegar veiðitölur miðað við árstíma" segir Haraldur Eiríksson hjá Hreggnasa í samtali við Veiðivísi.  "Við erum bara ánægðir með þessa byrjun í Kjósinni og ekki minna sáttir við stöðuna í Grímsá en þar hefur verið prýðileg veiði frá opnun og vatnið í báðum ánum mjög gott svo við bíðum eins og aðrir spenntir eftir næstu straumum" bætir Haraldur við.  Lokatölurnar í fyrra í Grímsá voru 608 laxar en veiðin er nú þegar komin í 121 lax og allt besta tímabilið framundan.  Laxá í Kjós endaði í 601 laxi í fyrra og er komin í 76 laxa en hún eins og margar ár á vesturlandi fær yfirleitt sínar stærstu göngur í júlístraumnum og það getur verið ansi magnað að sjá þegar torfurnar safnast saman í Kvíslafossi en sá staður er jafnan kallaður "Gullið" á göngutímanum því takan á þessum stað getur verið og er yfirleitt alveg ótrúlega góð.