Elon Musk sviptir hulunni af Model 3

Elon Musk, einn stofnandi rafbílaframleiðandans Tesla, hefur birt fyrstu myndir af rafbílnum Model 3. Bíllinn er sá fyrsti frá Tesla sem fjöldaframleiddur er fyrir kaupendur á almennum markaði. BBC greinir frá.

Musk deildi myndum af bílnum á Twitter-síðu sinni í gær en fyrstu þrjátíu eigendur bílsins munu fá að setjast undir stýri þann 28. júlí næstkomandi. Að því búnu verður bíllinn gerður aðgengilegur kaupendum úr röðum almennings.

First Production Model 3 pic.twitter.com/TCa2NSUNI3

— Elon Musk (@elonmusk) July 9, 2017

Bíllinn er fjögurra dyra og mun kosta 35 þúsund Bandaríkjadali eða rúmar 3,6 milljónir íslenskra króna. Tesla sérhæfir sig meðal annars í framleiðslu á rafbílum en verðið á Model 3 nemur um helmingi verðsins á næstódýrasta bíl fyrirtækisins.

Skráningum á nýjum Teslu-bílum í Kaliforníu-fylki í Bandaríkjunum, þar sem stærstur hluti viðskiptavina fyrirtækisins býr, fækkaði um 24 prósent í apríl á síðasta ári í samanburði við aprílmánuð árið 2014.

Þá birtir Elon Musk nýju myndirnar af Model 3 í kjölfar fréttaflutnings af bílaframleiðandanum Volvo, sem hyggst verða fyrsti hefðbundni bílaframleiðandinn til að hætta alfarið notkun á bensín- og díselvélum í bifreiðar sínar.

pic.twitter.com/is6Hthjjoj

— Elon Musk (@elonmusk) July 9, 2017