Alvarlegt slys hjá gámastöðinni á Selfossi

Ungur maður slasaðist alvarlega þegar bifreið féll af tjakki á hann á gámasvæðinu við Víkurheiði á Selfossi í kvöld. Lögreglu og sjúkraflutningsmönnum barst tilkynning þess efnis um níuleytið í kvöld og héldu á vettvang.

Í tilkynningu frá lögreglunni á Suðurlandi, sem barst fréttastofu á tólfta tímanum í kvöld, segir að ungi maðurinn hafi klemmst fastur undir bifreiðinni sem maðurinn var að vinna undir. Endurlífgunartilraunir á vettvangi báru árangur og var maðurinn fluttur með þyrlu Landhelgisgæslunnar á bráðamóttökuna í Fossvogi í Reykjavík.

Líðan mannsins er eftir atvikum. Starfsmenn gámasvæðisins sögðu í samtali við Vísi að gámasvæðið sé lokað á kvöldin og þar eigi enginn að vera á ferli.

Fréttin hefur verið uppfærð.