Jayden K. Smith gerir fólk á Facebook gráhært

Fjöldi fólks á Facebook fær nú skilaboð í stórum stíl þess efnis að það megi undir engum kringumstæðum samþykkja vinabeiðni frá Jayden K. Smith nokkrum. Því hann sé lævís hakkari þæfi sig inn á Facebookreikning þinn með ófyrirsjáanlegum afleiðingum. Þeir sem fá þessi skilaboð eru jafnframt beðnir um að vara alla sína vini við þessum þrjóti með því að senda þeim skilaboð þar að lútandi.

Eftir því sem næst verður komist er um að ræða hrekk en ekki hakk. Og víst er að hrekkurinn hefur heppnast því Facebook er beinlínis undirlagt af Jayden þessum.

Heiða B. Heiðars, auglýsingastjóri Stundarinnar, er fremur virkur Facebookverji og hún segir: „Allir hakkarar heimsins eru í áfalli yfir því hvað Íslendingar eru fljótir að átta sig á því þegar hakkið er í gangi, koma skilaboðunum á hvert einasta helvítis Íslending og munu aldrei reyna þetta aftur.“

Séra Hildur Eir Bolladóttir er ekki frá því að hún „vilji bara frekar rekast á þennan hakkara en að fá tvöþúsund skilaboð um að forðast hann, veit að ég er með athyglisbrest en ég er samt alveg búin að ná þessu.“

Sóli Hólm, útvarpsmaður og skemmtikraftur, hefur þetta um málið að segja: „Vinsamlegast ekki segja mér að segja öllum vinum mínum að samþykkja ekki Jayden K. Smith sem vin...“

En, það er svo Birgir Örn Guðjónsson, aka Biggi lögga eða Biggi flugþjónn eftir atvikum, sem er alltaf á vaktinni og reynir að róa mannskapinn með upplýsandi hætti:

„Nei þarna. Þessi Jayden K. Smith er ekki einhver hættulegur hakkari sem hakkar þig inn á reikninginn þinn og vina þinna ef þú samþykkir hann sem vin. Það virkar bara ekki þannig. Sá sem byrjaði þennan póst var heldur enginn tölvuhakkari en engu að síður ágætis tölvuprakkari sem fékk fullt af fólki um allan heim til að áframsenda tilgangslausan póst,“ segir Biggi og með fylgir broskall að hætti hússins.