Róbert Downey var á bólakafi í poppinu

Róbert Downey lögmaður var á bólakafi í poppinu á sínum yngri árum og samdi meðal annars dægurlagatexta fyrir hina fornfrægu hljómsveit Svanfríði á hippaárunum. Gunnar Lárus Hjálmarsson, öðru nafni Dr. Gunni, poppfræðingur greinir frá þessu á sinni Facbooksíðu.

Mál Róberts Downey hafa verið mikið til umfjöllunar að undanförnu og vakti það upp mikla reiði víða í samfélaginu þegar hann hlaut uppreist æru, en hann var dæmdur á sínum tíma fyrir að hafa brotið kynferðislega á unglingsstúlkum, misnotað aðstöðu sína og tælt þær til fylgilags við sig með blekkingum og fégreiðslum.

Þetta hefur þá leitt til þess að kastljósið hefur beinst að Róberti, menn að velta við steinum og fór Dr. Gunni til að mynda að gramsa í sínum poppgögnum.

„Aðkoma níðingsins/lögmannsins Róberts Árna að poppinu hefur ekki farið hátt. Hann samdi engu að síður alla textana á plötu Péturs Kristjánssonar og félaga í Svanfríði, „What's Hidden There“ (1972). Í dag er þetta fágætur safngripur og seljast vel meðfarin eintök af plötunni á sirka 100þ kall,“ segir Dr. Gunni.

Nokkur umræða er um þetta á Facebooksíðu hans en þar er meðal annars bent á að ýmsir í poppgeiranum hafa orðið uppvísir af einu og öðru misjöfnu og eru nefndir til sögunnar í því samhengi Gary Glitter, Michael Jackson og Jerry Lee Lewis.