WOW air breytir ekki flugfreyjubúningunum vegna flugs til Tel Aviv

Ekki stendur til að breyta flugfreyjubúningum WOW air vegna fyrirhugaðs áætlunarflugs félagsins til Tel Aviv í Ísrael. Vísir hefur fengið allnokkrar ábendingar um að unnið sé því að lengja ermar jakka og síkka pils af tillitssemi við blygðunarkennd strangtrúaða gyðinga en að sögn Sverris Fals Björnssonar, verkefnastjóra á samskiptasviði WOW air, er ekkert slíkt í farvatninu.

„Nei það eru engar breytingar fyrirhugaðar á búningunum enda þykir engin þörf á því. Búningarnir sem við notumst við í augnablikinu teljum við jafn hæfa í flug til Tel Aviv eins og aðra áfangastaði okkar og engar kröfur hafa verið gerðar frá utanaðkomandi aðilum varðandi hönnunina á þeim,“ segir Sverrir.

Strangtrúaðir stífir á meiningunni

Strangtrúaðir gyðingar geta reynst allstífir á meiningunni. Ísraelska flugfélagið EL AL þurfti að koma þeim skilaboðum sérstaklega á framfæri við þá að engin synd sé að biðjast fyrir sitjandi. Strangtrúaðir gyðingar hafa gjarnan á lengri flugleiðum staðið upp og beðist fyrir eins og þeim er fyrir lagt, en þeir eiga að biðjast fyrir þrisvar á dag.

Flestir gyðingar aðhyllast svokallaðan rabbínískan gyðingdóm en til nokkrir minni hópar, eins og Kabbalah og Hasidistar, og svo þeir eru ekki sérlega umburðarlyndir gagnvart frjálsræði því sem hönnunin grundvallast á og boðar.

Ansi djarfur búningur

Flugfreyjubúningar WOW air vöktu verulega athygli þegar þeir voru kynntur til sögunnar á sínum tíma. Í fyrra fjallaði Fréttablaðið sérstaklega tískuna í háloftunum og þá meðal annars um þennan búning með fulltingi Önnu Margrétar Jónsdóttur fyrrum flugfreyju hjá Icleand Air og tískulöggu, eins og hún var kynnt til sögunnar.

Einkennisfatnaður WOW air er ansi djarfur, og held ég að hann eigi að vera það. Mjög djarfur litur og fer flestum vel. Það er ekki eins breiður aldurshópur hjá WOW air eins og er hjá Icelandair og þess vegna er hægt að rokka þann búning meira en hinn,“ sagði Anna Margrét við blaðamann Fréttablaðsins og bætti því við að persónulega finnist henni meiri klassi yfir einkennisfatnaði Icelandair.