Tvær milljónir Peugeot og Citroën dísilbíla með svindlhugbúnað

Svo virðist sem fleiri bílaframleiðendur en Volkswagen hafi óhreint mjöl í pokahorninu er kemur að dísilbílum þeirra. Rannsókn sem staðið hefur yfir í Frakklandi á dísilbílasmíði PSA Peugeot Citroën hefur leitt í ljós að fyrirtækin tvö framleiddu hátt í 2 milljónir bíla með svindlhugbúnaði.

Þessi hugbúnaður virkar í grófum dráttum eins og svindlhugbúnaður Volkswagen þannig að við prófanir sýna bílarnir lága NOx mengun, en margfalda mengun í daglegum akstri. Rannsóknarteymið hefur undir höndum skjal frá PSA Peugeot Citroën þar sem rætt er um þörfina á að gera svindlhugbúnaðinn minna sýnilegan og augljósari.

Vart ætti að þurfa meiri sannanir úr herbúðum PSA. Fyrir frönskum dómstólum liggja nú kærur á hendur bílaframleiðendunum Volkswagen, Renault, Fiat Chrysler og nú síðast PSA Peugeot Citroën og aldrei að vita nema þeim muni fjölga enn. PSA neitar öllum ásökunum, en ekki er víst að það komi fyrirtækinu til góða er framí sækir. Hlutabréf í PSA Peugeot Citroën lækkuðu um 4,4% í kauphöllinni í París við þessar fréttir.