Borgward sýnir sportbíl í Frankfürt

Þýsk-kínverski bílaframleiðandinn Borgward mun kynna nýjan sportbíl á bílasýningunni í Frankfürt í þessum mánuði. Borgward, sem er rótgróið þýskt bílamerki hætti bílaframleiðslu árið 1962 en framleiðsla var svo hafin aftur eftir innkomu kínverska bílaframleiðandans Foton árið 2015.

Borgward kynnti einmitt jeppann BX7 í Frankfürt fyrir örfáum árum og hefur selt 44.000 eintök af bílnum nú þegar. Hefur hann verið framleiddur í verksmiðjum Foton í Kína. Borgward hefur ekki mikið látið uppi um nýjan sportbíl sinn sem stendur til að sýna í Frankfürt, en hefur þó sent frá sér stríðnimyndir af hluta bílsins.

Ef mark má taka af þessum myndum verður þessi bíll harla óvenjulegur útlits og gæti þarna verið kominn nútímalegur arftaki vinsælustu bílgerðar Borgward frá upphafi, Isabella bílsins sem seldist í meira en 200.000 eintökum á árunum 1954 og 1962.