Veigra sér við umræðu um offitu af hræðslu við viðbrögð sjúklings

Læknar veigra sér við að opna umræðu um offitu við sjúklinga af hræðslu við viðbrögð þeirra að sögn formanns félags fagfólks um offitu. Á sama tíma leitar feitt fólk síður til læknis af hræðslu við fordóma. Þetta er meðal þess sem kom fram á ráðstefnu sem Félag fagfólks um offitu stóð fyrir í dag.

Reglulega berast fréttir af nýjum rannsóknum þar sem í ljós kemur að Ísland sé feitasta þjóð í Evrópu. Þá er það staðreynd að í dag er offita eitt útbreiddasta heilsufarsvandamálið.

Erla Gerður Sveinsdóttir, læknir og formaður félags fagfólks um offitu, útskýrir að eitt af markmiðum ráðstefnunnar sé að fagfólk í heilbrigðisgeiranum ræði saman um leiðir til að tala við sjúklinga um offitu. „og að heilbrigðisstarfsmenn geti óhræddir opnað umræðu um offitu án þess að vera ásakaðir um fordóma,“ segir Erla Gerður og bætir við að það gerist oft.

„Og fólk veit ekki alveg hvernig það á að opna umræðuna og það verður hrætt. Við erum að vinna í því og erum til dæmis að vinna með kanadískum samtökum þar sem við erum að vinna með ákveðið kerfi um það hvernig er auðvelt að opna umræðu þannig að það skapist engin skömm og engin vanlíðan,“ segir Erla Gerður.

Á sama tíma veigrar fólk í ofþyngd sér við að leita sér aðstoðar. „það er einhvernvegin alls sett á holdarfarið og ekki hlustað á það sem sjúklingnum virkilega liggur á hjarta.“

Erla segir mikilvægt að það verði vitundarvakning um offitu í samfélaginu enda geti verið margir áhættuþættir af því að vera í ofþyngd. „Við megum ekki horfa fram hjá því að offita er áhættuþáttur. Það getur vel verið að viðkomandi sé hraustur en þá er allt í lagi að komast að því og þá heldur viðkomandi bara áfram sínu. En við megum heldur ekki missa af því ef það eru komnir einhverjir efnaskiptaþættir,“ segir Erla Gerður.