Kókaín og gras áfram vinsælt

Mest er verslað með gras, amfetamín og kókaín á ólöglegum fíkniefnamarkaði. Þetta kemur fram í tilkynningu frá SÁÁ um mánaðarlega könnun á verðlagi á slíkum efnum sem gerð var á innrituðum sjúklingum á Vogi.

Einnig kemur fram að óvenju mikið hafi verið höndlað með MDMA-duft eða kristalla í síðasta mánuði og að verðið á því virðist hið sama og á kókaíni.

Fáir svarendur sögðust hafa keypt fíkniefnið Spice, aðeins tveir, og átta höfðu notað kannabisefni í rafrettur.

Samkvæmt könnuninni helst verð á algengustu efnum nokkuð stöðugt. Kostar grammið af grasi til að mynda 2.820 krónur að meðaltali samanborið við 2.890 í júlí og grammið af kókaíni 16.430 samanborið við 15.910 krónur í júlí.