Reytingur af rjúpu í ausandi rigningu og hvassviðri

Í dag hófst rjúpnaveiðitímabilið og víst er að ekki viðraði vel til veiða. En, menn hafa þó verið að ná fugli.

„Það var ekki þurr þráður á okkur enda bálhvasst og ausandi rigning,“ segir Sigurjón Ragnar ljósmyndari og leiðsögumaður í stuttu samtali við fréttstofu.

Hann birti mynd af feng dagsins á Facebooksíðu sinni, fjórar rjúpur sem má teljast gott miðað við aðstæður. Annað sem setur strik í reikninginn er að nú er auð jörð víðast og fuglinn heldur sig því í meiri hæði til að nota felulit sinn betur.

Annar fjölmiðlamaður sem gekk til veiða í morgun er svo Baldur Guðmundsson blaðamaður. Hann var ánægður með sinn hlut og má vera það.

„Þau voru drjúg, morgunverkin,“ segir Baldur en hann náði átta rjúpum. Félagi hans öðru eins. Baldur var á ferð á Suðvesturlandi en stefnir ótrauður norður um næstu helgi. „Það var svo hvasst að önnur linsan fauk úr mér. Sönn saga,“ bætir Baldur við.

Annar sem náði í fugl var Tómas Skúlason eigandi Veiðiportsins. Hann er léttur:

„Þrátt fyrir að hafa misst hárkolluna út á haf i rokinu i morgun þá náðust þessar 2 hænur,“ segir Tómas, glottir og birtir mynd af velktum hundi sínum honum Tinna og tveimur rjúpum.

Vísir hefur frétt af fleirum sem hafa náð fuglum í dag en víst er að sú gagnrýni sem sett hefur verið fram á fyrirkomulagið, að þar sé aðeins 12 dögum til að dreifa, næstu fjórar helgar, mun fá byr undir báða vængi í ljósi þess hversu erfiðar aðstæðurnar voru í dag. Þær bjóða uppá það að menn séu að flækjast á fjöll burtséð frá aðstæðum, sem aldrei er góð latína.