100.000 BMW i3 rafmagnsbílar framleiddir

Rafmagnsbílavæðing heimsins hefur vafalaust ekki farið framhjá neinum, en þeir eru samt býsna fáir rafmagnsbílarnir sem framleiddir hafa verið í meira en 100.000 eintökum. Þeim tímamótum var þó náð í Leipzig hjá BMW í síðustu viku. BMW i3 rafmagnsbíllinn hefur verið í framleiðslu hjá BMW síðan seint á árinu 2013 og í Leipzig eru nú framleiddir 120 slíkir bílar hvern dag. Í fyrra voru þar framleiddir 26.631 BMW i3 bílar.

Til samanburðar voru framleiddir þar aðeins 2.783 BMW i8 tengiltvinnbílar, en sá bíll er bæði talsvert stærri og miklu dýrari sportbíll. BMW framleiðir reyndar fleiri tengiltvinnbíla, til dæmis í formi BMW X5 jeppans og ef þeir eru lagðir saman við i3 rafmagnsbílinn er stutt í að BMW hafi framleitt 200.000 slíka frá upphafi. BMW ætlar að hafa einar 25 bílgerðir í boði árið 2025 sem að hluta til eða að öllu leiti verða knúnir rafmagni.