Munu fljúga beint á alla leikstaði Íslands á HM næsta sumar

Icelandair mun fljúga að minnsta kosti eitt flug til þeirra þriggja borga í Rússlandi þar sem leikir Íslands í riðlakeppni HM fara fram næsta sumar.

Þetta kemur fram í tilkynningu frá flugfélaginu. Ljóst verður 1. desember um hvaða borgir verður að ræða og hverjir leikdagar Íslands verða þegar verður dregið í riðla keppninnar. Flogið verður frá Íslandi daginn fyrir leik og til baka daginn eftir leik.

Guðjón Arngrímsson, upplýsingafulltrúi Icelandair, segir flugfélagið fá mikið af fyrirspurnum um HM og að ljóst sé að fjöldi Íslendinga munu gera sér ferð á keppnina. „Eflaust munu margir nýta sér áætlunarflug til borga í Evrópu og taka þaðan flug eða lest á áfangastað, en nú liggur fyrir að Icelandair mun fljúga beint á alla þrjá leiki Íslands í riðlakeppninni“, er haft eftir Guðjóni í tilkynningunni.