Mál Norðmanns sem sakaður var um nauðgun á sextán ára stúlku fellt niður

Norðmaðurinn sem grunaður var um að hafa nauðgað sextán ára stúlku á salerni á skemmtistað í Reykjavík þann 28. október síðastliðinn hefur verið látinn laus úr farbanni og mál hans látið niður falla. Þetta staðfestir embætti héraðssaksóknara í samtali við Fréttablaðið, en málið þótti ekki nægilega líklegt til sakfellingar.

Maðurinn, sem er um fertugt, var úrskurðaður í farbann þann 10. nóvember síðastliðinn. Var það gert að kröfu lögreglustjórans á höfuðborgarsvæðinu sem taldi manninn undir rökstuddum grun að hafa nauðgaðs túlkunni, en sá norski neitaði alfarið sök.

Fram kemur í kröfu lögreglustjórans, sem birt er á vef Hæstaréttar, að maðurinn og stúlkan hafi hist á skemmtistað þann 28. október. Þau hafi kysst, vel farið á með þeim og þau farið inn á salerni staðarins. Þar hafi hann rifið niður um hana buxurnar og við það hafi hún frosið. Í framhaldinu hafi maðurinn haft við stúlkuna samræði, þrátt fyrir mótmæli hennar.

Lögreglan fór í framhaldinu fram á farbann, með vísan til þess að maðurinn væri ferðamaður hér á landi og að ella muni hann fara af landi brott. Farbannið rann út 22. nóvember síðastliðinn og eftir því sem Fréttablaðið kemst næst, er maðurinn farinn úr landi.