Frú Agnes fær harðan pakka frá kjararáði

Kjararáð úrskurðaði um laun biskups á sunnudaginn. Umtalsverð hækkun á launum mun hafa verið ákveðin til handa biskupi yfir Íslandi, Agnesi M. Sigurðardóttur, um er að ræða afturvirkni, en fyrir því eru fordæmi og öðrum kirkjunnar mönnum.

Kjararáð hefur ekki enn birt úrskurðinn á síðu sinni. Nokkuð er langt um liðið síðan ráðið úrskurðaði sérstaklega um laun biskups. Síðasti úrskurðurinn þess efnis er frá árinu 2007 en þá segir að biskup skuli vera í launaflokki 135, sem þýðir 926 þúsund krónur. Auk þess er kveðið á um að biskupi skuli greiða 34 einingar fyrir alla yfirvinnu. Samkvæmt tekjublaði Frjálsrar verslunar 2016 var Agnes með 1,139 milljónir króna á mánuði.

Vísir hefur reynt að komast yfir téðan úrskurð en án árangurs. Samkvæmt Fréttablaðinu í morgun stendur til að birta úrskurðinn í vikunni, áður en jólahátíðin hefst. Víst er að ákvörðunin er ekki vel auglýst. Samkvæmt upplýsingum frá Fjársýslu ríkisins hefur erindið ekki enn borist til afgreiðslu frá kjararáði.

Vísir ræddi við biskupsritara, Þorvald Víðisson, sem sagðist ekki vera alveg inni í málinu og hann þyrfti að kynna sér þetta nánar. En, „ég vissi að þetta var yfirvofandi,“ segir Þorvaldur; reyndar fyrir nokkrum vikum, mánuðum – jafnvel árum. Biskupsritari vísar þar óbeint til þess að langt er um liðið síðan úrskurðað var um laun biskups. En, vert er að geta þess að kjararáð úrskurðar reglulega um svokallaða almenna hækkun sem á þá við um allan pakkann. Í fyrra var til að mynda ákveðin launahækkun sem nemur 7,15 prósentum.

Í frétt DV frá árinu 2000 kemur fram að Prestafélag Íslands telji laun biskups óeðlilega „lág miðað við stöðu hans meðal embættismanna þjóðarinnar og miðað við vægi embættis hans.

Þrátt fyrir ítrekaðar tilraunir tókst ekki að ná tali af Jónasi Þór Guðmundssyni, formanni Kjararáðs, til að fá nánari upplýsingar um hvað felst í úrskurðinum. Svanhildur Kaaber á sæti í kjararáði auk Huldu Árnadóttur. Svanhildur svaraði eftir að síminn hafði hringt nokkrum sinnum út og sagði: „Ég hefði ekki svarað ef ég hefði vitað að þú værir blaðamaður. Talaðu bara við hann Jónas. Bless. Bless. Bless.“