Ari Eldjárn malar gull með góðu gríni

Svo gott sem uppselt er á grínsýningar Ara Eldjárn í Háskólabíói en aðeins hefur verið hægt að nálgast miða í stök sæti. Upphaflega voru sex sýningar settar á sölu, tveimur var bætt við og loks einni til viðbótar. Alls eru sýningarnar því níu en salurinn tekur 948 í sæti. Miðinn kostar 5,900 krónur sem þýðir einfaldlega það að andvirði miðasölunnar nemur rúmum 50 milljónum króna.

„Þetta hefur gengið eins og í sögu,“ segir Ari í samtali við Vísi.

„Framar björtustu vonum og ég er þakklátur og auðmjúkur.“

Ljóst er að Ara lætur ýmislegt betur en ræða um peninga. Honum finnst það ekkert sérstaklega fyndið og segist ekki geta gefið neitt upp um kostnaði og samkomulag sitt við húsið og miðasöluna. Trúnaður ríki um það. En, miðasalan rennur sem sagt ekki öll í hans vasa. „Kostnaðarsöm sýning. Ég geri þetta allt upp eftir á. Og á eftir að taka þetta saman. En, jájá, það verður fróðlegt að sjá hvað kemur út úr þessu. Þetta er það mesta sem ég hef nokkurn tíma selt. Það er nú innbyggt í mann að er á meðan er,“ segir Ari sem vill hafa vaðið fyrir neðan sig og spara yfirlýsingarnar.

Ari á nú fjórar sýningar að baki og fimm standa fyrir dyrum. „Ég er hálfnaður. Viðtökurnar hafa verið svakalega góðar. Það hefur gengið hrikalega vel og þungu fari af manni létt þegar búið var að frumsýna. Ég hef verið að plana þetta í einhverja mánuði.“

Ari segir að Háskólabíó sé uppáhalds salurinn sinn. Stór og þegar brestur á með hlátrasköllum myndist mikill hávaði. Þegar sýningunum lýkur tekur við það að sýna með Mið-Íslandi, grínhópi sem Ari tilheyrir en Mið-Ísland stefnir að því að keyra sýningar stíft fram í mars.