Kyrrsetningarbeiðni á eignum Valitor hafnað

Sýslumaðurinn á höfuðborgarsvæðinu hefur hafnað kyrrsetningarkröfu Datacell og Sunshine Press Productions á eignum Valitor.

Sveinn Andri Sveinsson, lögmaður Datacell og Sunshine Press Productions í skaðabótamáli þeirra gegn Valitor, fór fram á að sýslumaðurinn á höfuðborgarsvæðinu kyrrsetji eignir Valitor upp á sex og hálfan milljarð.

Datacell og Sunshine Press production sáu um rekstur greiðslugáttar fyrir Wikileaks en Valitor ákvað einhliða og án fyrirvara að loka þessari gátt árið 2011. Hæstiréttur komst hins vegar að þeirri niðurstöðu árið 2013 að þessi ákvörðun hafi verið ólögmæt og í kjölfarið ákváðu fyrirtækin að höfða skaðabótamál.

Í tilkynningu frá Valitor, þar sem greint er frá ákvörðun sýslumannsins segir að ákvörðunin komi ekki á óvart „enda telur Valitor að kyrrsetningarkrafan hafi ekki átt við nein rök að styðjast.“