LEX kaupir GH Sigurgeirsson

Lögmannsstofan LEX hefur keypt hið 80 ára gamla fyrirtæki GH Sigurgeirsson, sem sérhæfir sig í vörumerkja- og einkaleyfarétti. Fyrirtækið mun fá nafnið GH Sigurgeirsson Intellectual Property og verður rekið sem sjálfstætt dótturfyrirtæki LEX.

LEX hefur lengi verið mjög framarlega á sviði hugverkaréttar, og hefur á að skipa meðal annars tveimur af helstu lögmönnum landsins í því sviði, þeim Erlu S. Árnadóttur og Huldu Árnadóttur. Með kaupunum er ætlunin að breikka þetta svið til muna.

Allir viðskiptavinir GH Sigurgeirssonar eru erlendir, en þar á meðal eru um 500 fyrirtæki hér á landi í eigu erlendra aðila. Gengið var frá kaupunum endanlega núna í haust en þá ákvað eigandinn, Gunnar H. Sigurgeirsson, að setjast í helgan stein. Hann hafði þá verið starfandi í rúm 50 ár.

„Við viljum að viðskiptavinir okkar geti fengið allt á einum stað hvað hugverkarétt varðar. Málum er tengjast hugverkaréttindum fer fjölgandi, hvort sem það er í hugbúnaðargeiranum, á sviði einkaleyfa, vörumerkja eða í hinum skapandi geira, tónlist, kvikmyndum eða bókmenntum. Við sjáum þetta fyrir okkur sem mikið vaxtarsvið í framtíðinni í íslenskri lögfræði, sem unnt er að sinna betur,“ er haft eftir Erni Gunnarssyni faglegum framkvæmdastjóra Lex.