Gæsaveiðin gengur vel

Gæsaveiðin hefur nú staðið yfir í rúmar sex vikur og samkvæmt þeim fréttum sem berast frá skyttum landsins er fín veiði.

Það virðist vera nokkurn veginn sama hvar drepið er niður fæti á gæsaslóðum.  Skyttur landsins hafa verið að gera góða veiði á túnum og ökrum landsins og snjókoma síðustu daga er farin að ýta fuglinum í miklu magni niður af hálendinu.  Heiðagæsin virðist vera farin að fljúga af landi brott í einhverjum mæli en það er þó að veiðast ágætlega af henni þá sérstaklega á suðurlandi.  Tún og akrar um allt land eru að sögn þeirra sem hafa verið mikið á ferðinni full af gæs og það á bara eftir að bætast í það.

Fyrstu vikurnar sækja gæsaskyttur gjarnan mest í heiðagæs en þegar líður á tímabilið fara menn að liggja fyrir í korni og túnum en þá er það helst grágæs sem verið er að skjóta.  Í nokkrum ökrum á suðurlandi eru þúsundir gæsa farnar að safnast saman í hópa og það rímar vel við tölur sem við erum að heyra af árangri veiðimanna en 60-80 fugla morgnar hafa verið dalegt brauð í bestu ökrunum.