Reglur settar til að hemja nethagkerfi eins og Airbnb

Leiðtogafundur Sharing Cities hefur sent frá sér sameiginlega yfirlýsingu þar sem meðal annars er komið inn á myndun tengslanets til að sporna við ólöglegri leigu húsnæðis til ferðamanna.

Þetta kemur fram í tilkynningu frá Reykjavíkurborg en þar segir Þórdís Lóa Þórhallsdóttir, formaður borgarráðs og staðgengill borgarstjóra, sitji leiðtogafundinn í Barcelona fyrir hönd Reykjavíkurborgar.

Í tilkynningunni er haft eftir Þórdísi Lóu að Reykjavíkurborg fagni þróuninni í þessum mikilvæga málaflokki, deilihagkerfið sé komið til að vera og muni bæði stækka og umbreytast gríðarlega á komandi árum. „Reykjavíkurborg vill vera frjór jarðvegur fyrir þessa þróun. Við viljum mæta henni með nýsköpun, krafti og skýrum línum. Það er nauðsynlegt að hafa skýran ramma utan um starfsemina og huga að því hvernig hægt er að koma sem best til móts við ólíkar þarfir fólks,“ er haft eftir Þórdísi Lóu sem er sögð um leið leggja áherslu á að fundnar verði leiðir til að bæta notendaviðmót allrar þjónustu.

Í yfirlýsingu leiðtogafundarins er kveðið á um meginreglur borga og skuldbindingar um sjálfsstjórn borga gagnvart nethagkerfinu. Í yfirlýsingunni er einnig að finna ítarlega aðgerðaáætlun um mikilvæg atriði eins og sameiginlegar lágmarkskröfur í samningaviðræðum og leiðir til að styðja borgir í slíkum viðræðum við fyrirtæki sem reka nethagkerfi; hagsmunagæslu gagnvart öðrum stjórnsýslustigum og myndun tengslanets til að sporna við ólöglegri leigu húsnæðis til ferðamanna svo eitthvað sé nefnt.

Þá verður stofnaður starfshópur til að efla samskipti, samstarf og samhæfingu aðgerða á milli borga.