Kolbeinn Aron er látinn

Kolbeinn Aron Arnarson markmaður ÍBV í handknattleik varð bráðkvaddur á heimili sínu í Vestmannaeyjum um jólin. Frá þessu er greint á vefsvæði íþróttafélagsins ÍBV.

Þar segir að Kolbeinn Aron hafi verið einn af lykilmönnum í uppbyggingu og velgengni handboltans í Vestmannaeyjum undanfarin ár.

Samfélagið í Vestmannaeyjum er slegið vegna fráfalls Kolbeins.

„Fráfall Kolbeins Arons er öllum sem þekktu hann mikið áfall. Hjá okkur sem vorum með honum í handboltanum situr eftir sorg og söknuður: þakklæti og virðing,“ segir í færslunni.

Hér að neðan er hægt að lesa færsluna í heild sinni:

„Kolbeinn Aron Arnarson, markmaður ÍBV í handbolta, er látinn.

Hann varð bráðkvaddur á heimili sínu 29 ára að aldri.

Kolbeinn Aron var einn af lykilmönnum í uppbyggingu og velgengni handboltans í Vestmannaeyjum undanfarin ár.

Eftir að hafa æft og leikið með yngri flokkum ÍBV lék hann 17 ára gamall sinn fyrsta leik með meistaraflokki árið 2006. Alls spilaði hann 279 leiki fyrir félagið, sem gerir hann að fjórða leikjahæsta leikmanni þess frá upphafi. Kolbeinn Aron átti stóran þátt í því er liðið varð eftirminnilega Íslandsmeistari í fyrsta skipti árið 2014 og bikarmeistari ári síðar.

Fráfall Kolbeins Arons er öllum sem þekktu hann mikið áfall. Hjá okkur sem vorum með honum í handboltanum situr eftir sorg og söknuður; þakklæti og virðing.

Fjölskylda Kolbeins Arons vill koma á framfæri þakklæti til allra þeirra sem hafa sýnt henni samhug og stuðning þessa erfiðu daga.

ÍBV sendir fjölskyldunni dýpstu samúðarkveðjur.“