N4 biður enn um styrki frá sveitarfélögum til að gera jákvæða þætti

Sveitarfélög á Norðurlandi eystra fá nú bréf frá sjónvarpsstöðinni N4 á Akureyri þar sem óskað er eftir fjárframlögum til að halda úti þáttaröðinni Að norðan sem fjallar um menningu og mannlíf á Norðurlandi.

„N4 Sjónvarp nýtur engra opinberra styrkja og því er nauðsynlegt að hver þáttaröð standi undir sér, sérstaklega þegar um er að ræða stærri verkefni sem vikulegir þættir á borð við Að norðan eru,“ segir í bréfi sem meðal annars var sent til Langanesbyggðar þar sem sveitarstjóranum var falið að grennslast fyrir um hugmyndir N4.

Í bréfi N4 segir að árlega séu frumsýndir um fimmtíu þættir með um 200 innslögum úr heimsóknum í öll sveitarfélög á Norðurlandi. Áður hefur komið fram að N4 leggur áherslu á að gefa jákvæða mynd af því efni sem fjallað er um. „Án fjárhagslegrar aðkomu þeirra sem um er rætt er mjög flókið að láta dæmið ganga upp. Sveitarfélögin á Norðurlandi vestra hafa lengi komið að þessu verkefni og munu gera áfram. Sömu sögu er að segja af sveitarfélögum á Vesturlandi og Austurlandi með sambærilega þætti. En aðra sögu er því miður að segja um sveitarfélög á Norðurlandi eystra.“

N4 vísar í niðurstöður könnunar og árangursmats sem Samtök sveitarfélaga á Norðurlandi vestra létu gera vegna samstarfs við N4 um sjónvarps- og kynningarefni. Þar komi fram að allir teldu að umfjöllun stöðvarinnar hefði haft „mjög jákvæð“ eða „frekar jákvæð“ áhrif.

„Það er mat okkar að til þess að hægt sé að halda áfram þáttaröðinni „Að norðan“ á N4 með þeim hætti sem gert hefur verið síðustu ár, þurfi sveitarfélögin á Norðurlandi eystra, einnig að koma að borðinu. Hagurinn er allra,“ segir í bréfinu sem undirritað er af Maríu Björk Ingvadóttur, framkvæmdastjóra N4.