Une Misère á mála hjá Nuclear Blast

Íslenska öfgarokksveitin íslenska Une Misère hefur skrifað undir plötusamning við þýska útgáfurisann Nuclear Blast. Í tilefni þess gaf sveitin út lagið Damages ásamt myndbandi nú í morgun.

Hljómsveitin hefur starfað markvisst að þessu síðastliðin tvö ár en metnaður og kröftug sviðsframkoma sveitarinnar hefur ekki getað farið fram hjá þeim sem fylgjast með þessum anga tónlistar á Íslandi.

Þrátt fyrir það er þetta stórt skref fyrir sveitina og merkur árangur, sér í lagi þar sem sveitin hefur áður einungis gefið út eina smáskífu og þriggja laga kassettu á stafrænu formi.

Draumur að rætast

Samkvæmt tilkynningu frá sveitinni eru meðlimir Une Misère „yfir sig hrifnir af gangi mála og eru virkilega spenntir að fá þetta tækifæri til að komast nær markmiði sínu.“  

Þar kemur jafnframt fram að áður en hljómsveitin var stofnuð þótti þeim ansi fjarstæðukennt að eitthvað eins og þetta myndi í rauninni gerast, „að þetta stór draumur myndi í alvöru rætast.“

Sveitin er skipuð söngvaranum Jóni Má Ásbjörnssyni, trommuleikaranum Benjamín Bent Árnasyni, bassaleikaranum Þorsteini Gunnari Friðrikssyni og gítarleikurunum Finnboga Erni Einarssyni, Fannari Má Oddssyni og Gunnari Inga Jones, en Finnbogi og Fannar syngja einnig.

Nuclear Blast hefur hýst og hýsir mörg af allra stærstu nöfnum þungarokksheimsins í dag en þar má nefna Slayer, Meshuggah og Behemoth, en einnig má nefna að íslenska rokksveitin The Vintage Caravan er gefin út af plötufyrirtækinu.

Þunglyndi, kvíði og fíkn

Í tilefni samningsins ákvað sveitin að gefa út nýtt lag og myndband, við lagið „Damages“

Samkvæmt tilkynningu fjallar lagið um „að vera staddur á brúninni og það er engin undankomuleið í sjónmáli. Það fjallar um það að finna ekki fyrir neinu öðru en öllu því versta sem maðurinn getur ímyndað sér. Damages fjallar um þunglyndi, kvíða og fíkn því eins og er þá munu geðsjúkdómar og fíkn alltaf vera til staðar, þetta er ekki læknanlegt ástand. Hinsvegar er það meðhöndlanlegt – með hjálp.“

Þetta rímar við öflug skilaboð sem hljómsveitin hefur að flytja gagnvart geðsjúkdómum, fíknivandamálum og hvernig tekið er á þeim í dag.

Í tilkynningu kemur einnig fram að lagið sé tileinkað Bjarna Jóhannesi Ólafssyni, „góðum vini sem yfirgaf þennan heim alltof snemma.“